ILOILO CITY – Wala nakapugong ang ginapatuman nga Enhanced Community Quarantine sa isa ka deboto ni Nuestra Señora dela Candelaria nga magpadulong sa Jaro Metropolitan Cathedral agud live nga makapamati sang misa kadungan sang Easter Sunday.
Sa exclusive interview sang Bombo Radyo kay Amelita Galarpe sang Passi City, iya ginpahayag nga isa siya sa mga deboto nga makapamatuod nga nagamilagro si Nuestra Señora dela Candelaria.
Suno kay Galarpe, naluwas siya sa katalagman paagi sa iya himpit nga pagpangamuyo nga mag-ayo gikan sa balatian.
Ginpahayag ni Galarpe nga bisan sa balay ukon sa diin man nga lugar, mahimo nga makapangamuyo agud nga magpangayo sang pag-ubay kag magpasalamat sa Ginuo ilabi na subong nga may krisis.
Bangud sa iya near death experience, ginpahayag sang natungdan nga wala sang tupong ang iya pagdayaw sa Ginuo.
