KALIBO, AKLAN – Nagapabilin nga positibo ang panan-awan sa kabuhi sang 22 anyos nga Guillain–Barré syndrome (GBS) survivor sa pihak sang ginapangatubang nga pagpanghangkat sa kabuhi.
Sa Good Morning Philippines program, ginpahayag ni J-Royien Garmino sang Kalibo, Aklan, nga nag-umpisa ang iya balati-an sang siya ang 1st year college sa syudad sang Iloilo.
Suno kay Garmino, ginhuna-huna lang niya nga ang ginabatyag nga pagluya sang lawas ang tuga lang sang stress sa pagtuon tubtub nga nakumpirma nga may yara siya sang Guillain–Barré syndrome, isa ka tumalagsahon nga balatian sa immune system, naga-atake sa nerves kag nagatuga sang pagkaparalisa sang lawas.
Ginpahayag ni Garmino nga magluwas sa hilanat kag pagpalangluya, naapektuhan man ang iya vision ukon eyesight kag nangin daku nga pagpanghangkat para sa iya pamilya ang pagpangita sang pondo kag bulong ilabi pa nga pangayaw siya diri sa syudad sang Iloilo.
Nag-untat si Garmino sa pagtuon kag samtang yara sa hospital, indi malikawan nga nadulaan na siya sang paglaum nga mag-ayo kun basehan lang ang finding sang doktor.
Sa wala ginlauman suno sa natungdan, may yara sang mga good samaritan nga nagdonar sang bulong kag cash para sa iya medical treatment.
Sa subong suno sa natungdan, nagabatyag pa siya sa gihapon sang pagpalangluya apang wala siya nagadula sang paglaum nga amat-amat nga magabalik ang iya kusog.
