GUIMBAL ILOILO– Tuman ang kalipay sang pamilya sang labing una nga covid positive patient sa Panay bangud nakagwa na ini sa hospital.
Sa Interview sang Bombo Radyo kay Sangguniang Bayan Member Marcelino Gelvero, utod sang pasyente, iya ginpahayag nga indi matakos ang ila kalipay bangud ginpamatian sang mahal nga Ginoo ang ila pangamuyo nga mag-ayo nagikan sa coronavirus disease 2019 ang iya utod.
Suno kay Gelvero, madamo man nga pagtilaw ang naagyan sang ila pamilya humalin sang nagpositibo ang iya utod sa nasambit nga virus kag na admit sa hospital sadtong Marso 13, 2020.
Sa pihak sang tanan nga kabudlay suno sa konsehal, nasarangan ini nila tanan kag nangin kampante sila nga maga-ayo ang pasyente bangud nga nangin estable ang iya kondisyon samtang ginamonitor sang mga doktor kag nurses sa hospital.
Nagapasalamat man siya suno sa natungdan, bangud sa suporta nga ginahatag sa ila pamilya sang mga opisyales sang Banwa sang Guimbal kag sang Congresswoman sa primer distrito.
