ILOILO CITY – Naglab-ot na sa 1,041 ang nagkaladakpan nga nagalapas sa curfew may kaangtanan sa ginapatuman nga Enhanced Community Quarantine sa syudad sang Iloilo.
Sa interview sang Bombo Radyo kay Iloilo City Police Office Spokesperson Police Captain Shella Mae Sangrines, iya ginpahayag nga ang 1,041 ang ginalakipan sang 134 sa City Proper, 183 sa La Paz, 219 sa Jaro, 220 sa Molo, 203 sa Mandurriao kag 162 sa Arevalo.
Suno kay Sangrines, humalin sang Marso 17 tubtub Abril 12 nga data, apat na ang napasakaan sang kaso.
Ginpahayag ni Sangrines nga ang iban sa mga nadakpan ang ginpapauli na lang sa ila tagsa ka balay.
Ginasaway naman suno sa natungdan ang mga wala nagasuksok sang facemask sa pampubliko nga lugar.
Sa bahin naman sang Police Regional Office 6, naglab-ot sa 4,349 ang nadakpan sa ginapatuman nga curfew sa bug-os nga rehiyon.
Sa pagpaathag ni Police Lt. Col. Joem Malong, tagpamaba sang Police Regional Office 6, nagapanguna sa may pinakamadamu nga violators amo ang Bacolod City nga may 1,738, ginasundan sang Negros Occidental nga may 1,147, Iloilo City nga may 1,043 nga mas mataas sang duha sa record sang Iloilo City Police Office, Iloilo Province nga may 119, Aklan nga may 143, Antique nga may 85, Capiz nga may 64 kag Guimaras nga may 10.
Ginpahayag ni Malong nga sa nasambit nga data, 54 na ang napasakaan na sang kaso.
