ILOILO CITY – Nagapabilin nga 40 ang positibo nga kaso sang Coronavirus Disease 2019 (COVID-19) sa Western Visayas.
Sa interview sang Bombo Radyo kay Dr. Ma. Sophia Pulmones, tagpamaba sang Department of Health 6, iya ginpahayag nga sa data sang ahensya as of April 12, 2020, wala sang pagsaka sa numero sang COVID-19 case sa bug-os nga rehiyon.
Suno kay Pulmones, lunsay negatibo sa COVID-19 ang resulta sang tanan nga samples nga ginpaguwa sang damlag lang.
Sa subong, nagapabilin sa gihapon sa 7 ang patay samtang naglab-ot naman sa 7 ang naka recover.
May kaangtanan naman sa mga Overseas Filipino Workers nga magapuli sa Western Visayas, ginpahayag ni Pulmones nga requirment gid ang 14 days quarantine.
Sa pagpaathag ni Pulmones, temporaryo nga magatinir sa isolation facility nga gintumod sang Local Government Unit ang mga balikbayan agud masigurado nga wala sila sang sintomas ukon indi sila carrier sang COVID-19.
Ang mga nakitaan naman sang sintomas ang magatinir sa separado nga hulot agud nga indi malatnan ang iban nga nagapaidalom sa quarantine.
