ILOILO CITY – Padayon nga magahatag sang bulig ang Philippine Charity Sweepstakes Office apisar sang ginapatuman nga Work From Home Arrangement.
Sa internview sang Bombo Radyo kay Philippine Charity Sweepstakes Office Iloilo Manager Jeanette Lloyd, iya ginpahayag nga wala sang untat ang paghatag sang bulig sang ahensya.
Suno kay Lloyd, ang mga pasyente nga nagapaidalom sa dialysis, chemotherapy kag iban pa nga maluyag makabenepisyo sang bulig ang mahimo nga magpakig-angot sa social worker sang hospital kun sa diin naadmit ang pasyente.
Ginpahayag ni Lloyd nga ang social worker sang hospital amo naman ang magapakig-angot sa social worker sang ahensya agud nga maproseso ang requirements.
Nagalab-ot naman sa P2.5 Million ang gindonar sang Philippine Charity Sweepstakes Office sa Western Visayas Medical Center samtang lauman man nga may yara sang pondo nga igahatag sa tagsa ka hospital kag district hospital sa syudad kag probinsya sang Iloilo.
Kadungan sini, gin-athag sang natungdan nga suspendido sa gihapon ang tanan nga gaming operations sang Philippine Charity Sweepstakes Office.
