Mga opisyales kag pumuluyo sang Concepcion, Iloilo, naga-isa sa pagtapna sang COVID-19

CONCEPCION, ILOILO – Naga-isa ang mga opisyales sang banwa sang Concepcion, Iloilo kag ang mga pumuluyo sa pagtapna sang Coronavirus Disease 2019.

Sa interview sang Bombo Radyo kay Concepcion Mayor Raul Banias, iya ginpahayag nga ginakalipay niya ang suporta sang mga opsiyales sang banwa lakip na ang mga punong barangay kag mga pumuluyo sa diin nakahangop ang mga ini sang ila nagakadapat nga himuon agud indi masudlan sang virus ang banwa.

Suno kay Banias, indi lamang siya isa ka alkalde kundi isa man ka Doktor gani bentaha man ini sa iya bangud sa pagsunod sang mga pumuluyo sang mga preventive measures nga kinahanglan himuon.

Lakip sa mga tikang nga ginahimo sang banwa amo ang pag regulate sa pagguwa sang mga tawo, pag observe sang physical/social distancing kag pagbantay sa border control area.

Pahayag sang alkalde, may yara man ang Concepcion sang merkado on wheels nga nagadul-ong sang essential goods sa mga pumuluyo agud indi na ang mga ini magguwa kag magpanindahan.

Isa man sa mga rason kun ngaa wala sang kaso sang COVID-19 ang quinto distrito amo nga nagabuligay ang tagsa ka mga Local Government Unit sa nagkalain-lain nga banwa kag pagpakigbahin sang mga ideya sang mga alkalde.