ILOILO CITY – Nagapaidalom na sa isolation ang duha ka pasyente nga nagdugang sa mga nagpositibo sa Coronavirus Disease 2019 (COVID-19) sa Western Visayas.
Sa interview sang Bombo Radyo kay Dr. Ma. Sophia Pulmones, pinuno sang Local Health Support Division kag tagpamaba sang Department of Health 6, iya ginpahayag nga ang ika 41 nga COVID-19 patient amo ang 63 anyos nga lalaki sa Capiz kag may close contact sa duha ka COVID-19 patient sa nasambit nga probinsya.
Suno kay Pulmones, ang ika 42 naman nga COVID-19 patient amo ang 21 anyos nga lalaki sa Miagao, Iloilo kag may close contact sa iya lolo nga 94 anyos nga ginbawi-an sang kabuhi bangud sa nasambit nga virus.
Ginpahayag ni Pulmones nga ang 63 anyos nga lalaki ang nagapabilin sa hospital samtang naka home quarantine naman ang 21 anyos nga lalaki.
Sang nagligad nga Abril 15, 21 ka laboratory results ang ginpaguwa sang Western Visayas Medical Center kun sa diin duha diri ang positibo samtang 19 naman ang negatibo.
Sa subong, naglab-ot sa 42 ang COVID-19 case sa Western Visayas samtang 7 ang naka recover kag 7 man ang ginbawian sang kabuhi.
Samtang, may paathag naman ang Western Visayas Medical Center kun nga-a mahinay ang pagpaguwa sang laboratory results sa mga nakaligad nga adlaw.
Suno kay Pulmones, quality kag accuracy ang ginatutukan sang medical experts kun sa diin nagalab-ot sa 42 tubtub 48 ka oras ang gintalana nga tion antes makapaguwa sang resulta.
Ginpahayag ni Pulmones nga ginasunod man sang hospital management ang bag-o nga protocol nga ginapatuman sang Research Institute for Tropical Medicine tuhoy sa pagpatigayon sang labotarory test.
Magluwas diri, bag-o nga testing kits ang ginagamit rason nga nagakinahanglan pa sang validation kag parallel test agud maisgurado nga wala sang sala.
