OTON, ILOILO – Magapatuman sang block-off ang Local Government Unit sang Oton, Iloilo bilang pagsunod sa Enhanced Community Quarantine.
Sa interview sang Bombo Radyo kay Mayor Carina Flores, iya ginpahayag nga ang block-off ang patigayunon sa tagsa ka Dominggo kag maga-umpisa na sa Abril 19.
Suno kay Flores, kasubong sa syudad sang Iloilo, ang pharmacies lang ang pahanugutan nga magbukas samtang sirado naman ang tanan nga commercial establishment lakip na ang sari-sari stores.
Ginpahayag ni Flores nga ang banwa sang Oton ang ginakabig nga populous town sa Iloilo nga may masobra sa 104,000 ka residente kag may masobra sa 23,000 households rason nga kinahanglan gid magpatuman sang block-off bisan isa lang ka adlaw sa isa ka semana.
Exempted naman sa block-off ang medical personnel, media practitioner kag iban pa nga frontliners nga kinahanglan magtrabaho.
Sa subong suno sa natungdan, nakapanghatag na sang ayuda ang Local Government Unit sang Oton samtang ginapangitaan naman sang paagi agud nga makabaton sang bulig ang mga wala pa nakabaton.
