ILOILO CITY – Gin-athag sang Public Safety and Transportation Management Office nga magabukas ang mga merkado kag grocery stores apang sa limitado lamang nga tion kadungan sa una nga semana sang pagpatuman sang weekend block off.
Ini ang kasunod sang mga nagalapta nga sala nga impormasyon may kaangtanan sa mandu ni Iloilo City Mayor Jerry Treñas nga weekend block-off.
Sa interview sang Bombo Radyo kay Public Safety and Transportation Management Office Head Jeck Conlu, iya ginpahayag nga subong nga weekend, pahanugutan pa nga magbukas ang grocery stores apang humalin lamang sa 9:00 sa aga tubtub 3:00 sa hapon samtang magabukas naman humalin 5:00 sa aga ang mga merkado.
Suno kay Conlu, sa masunod nga weekend, Abril 25-26, siraduhon na ang merkado lakip na ang tanan nga commercial establishment kag ang pahanugutan lang nga magbukas amo ang botika, medical clinic kag hospital.
Para naman sa frontliners nga kinahanglan magtrabaho apisar sang block off, kinahanglan nga dal-on ang quarantine pass nga pirmado sang alkalde.
