ANTIQUE – Nagapabilin nga asymptomatic ang tatlo ka pasyente nga nagdugang sa listahan sang Coronavirus Disease 2019 (COVID-19) case sa Western Visayas.
Ini matapos nga naglab-ot na sa 45 ang kaso sang COVID-19 sa rehiyon matapos ang tatlo ka panibag-o nga kaso nga na record sa Antique.
Sa interview sang Bombo Radyo kay Dr. Ma. Sophia Pulmones, pinuno sang Loal Health Support Division kag tagpamaba sang Department of Health 6, iya ginpahayag nga santo sa record sang ahensya, ang Patient no. 43 ang naga-edad sang 45 anyos, ang Patient no. 44 ang naga-edad sang 59 anyos samtang ang Patient no. 45 naman ang naga-edad 65 anyos kag lunsay may close contact sa ila kaupod sa trabaho nga una nga nagpositibo sa nasambit nga virus.
Suno kay Pulmones, ang tatlo ka panibag-o nga kaso ang na record kasunod sang ginpaguwa nga laboratory results sang 140 ka specimen.
Apisar nga nagsaka ang numero sang COVID-19 case, nadugangan sang isa ang numero sang pasyente nga naka recover sa nasambit nga virus kag ini amo ang 51 anyos nga babayi sa Guimbal, Iloilo.
Sa subong, naglab-ot sa 8 ang naka recover kag nagapabilin sa 7 ang numero sang patay kag sa probinsya sang Antique, naglab-ot na sa 5 ang kumpirmado nga kaso.
Indi pa makumpirma ni Pulmones kun bala local transmission ang natabo sa probinsya sang Antique ilabi na nga magka-upod sa trabaho ang mga pasyente.
Sa pihak sini, ginpahayag ni Pulmones nga wala man ginadula ang posibilidad sang local transmission kag ang pat-od lang amo nga ginapaidalom sa quarantine ang tatlo ka mga pasyente.
Kadungan sini, gin-athag man ni Pulmones nga wala pa ginagamit sang Western Visayas Medical Center ang test kits nga gin-develop sang mga eksperto sang University of the Philippines.
