ILOILO CITY – Nangin mainit ang pagbayluhanay sang ideya sa ginpatigayon nga pagsinapol kaupod ang tag-iya sang Gegato-Abecia Funeral Homes & Crematory, Inc., tiglawas sang Department of Environment and Natural Resources, Department of Health kag ang mga pumuluyo sang Brgy. Balabago, Jaro, Iloilo City.
Ini ang may kaangtanan sa reklamo tuhoy sa baho nga nagahalin sa nasambit nga crematorium kun sa diin gina-cremate ang mga pasyente nga nagpositibo ukon nakitaan sang sintomas sang Coronavirus Disease 2019 (COVID-19).
Sa interview sang Bombo Radyo kay Fely Abecia, tag-iya sang crematorium, iya ginpahayag nga ang nagtaliwan nga COVID-19 patient ukon bisan nakitaan lang sang sintomas sang nasambit nga virus ang kinahanglan gilayon nga i-cremate sa sulod sang 24 oras.
Suno kay Abecia, ang bangkay ang nagakadapat nga putson sa plastic santo sa panugyan sang Department of Health kag bangud sini, naga-usbong ang baho sa tion sang cremation indi kasubong sa kinaandan lang nga pag-cremate sang patay.
Bangud sini, ginpanugyan sang Department of Health suno sa natungdan nga magpatigayon sang renovation agud nga malimitahan ang pag-usbong sang baho.
Pagatakdan naman sang scrubbers ang chimney sang nasambit nga crematorium.
Sa interview sang Bombo Radyo kay Atty. Arjunn Calvo sang Legal Division sang Department of Environment and Natural Resources Office 6, iya ginpahayag nga may yara sang renovation nga patigayunon agud nga masulusyunan ang problema sang mga pumuluyo.
Suno kay Calvo, may yara na sang kasugtanan ang ahensya kaupod ang Department of Health kag ang tag-iya sang crematorium tuhoy sa patigayunon nga mitigating measures.
Ginpahayag ni Calvo nga ang renovation ang ginabanta nga matapos sa sulod sang 3 tubtub 4 ka adlaw.
