TIGBAUAN, ILOILO – Lunsay asymptomatic ang duha ka Overseas Filipino Workers nga nagpositibo sa Coronavirus Disease 2019 (COVID-19) sa Tigbauan, Iloilo.
Sa interview sang Bombo Radyo kay Mayor Suzette Alquisada, iya ginpahayag nga ang duha ka seafarers ang kabahin sang una nga batch sang Overseas Filipino Workers nga nagpauli sa Iloilo sakay sa barko nga naghalin sa Cebu.
Suno kay Alquisada, lima ka seafarers ang taga Tigbauan apang santo sa resulta sang laboratory test, duha lang ang nagpositibo sa virus.
Ginpahayag ni Alquisada nga sang nagdungka sa syudad sang Iloilo ang barko, wala anay ginpapauli sa ila tagsa ka balay ang Overseas Filipino Workers apisar nga nakapaidalom na sila sa quarantine sa Metro Manila.
Sa pihak sini, ginpahayag sang alkalde nga indi pag-ipaidalom sa total lockdown ang barangay kun sa diin nagapauli ang duha ka seafarers bangud nga sa quarantine facility sa banwa sang Tigbauan sila nagderetso.
Sa subong, yara sa gihapon sa quarantine facility ang duha ka seafarers kag padayon ang monitoring sa ila kondisyon.
May kaangtanan naman sa pagpanghatag sang cash assistance sa Social Amelioration Program, ginpahayag sang natungdan nga indi gid malikawan nga may yara sang reklamo.
Suno kay Alquiisada, may 12 ka personnel gikan sa Department of Social Welfare and Development Office ang naka-assign sa banwa sang Tigbauan para sa verification kag checking ilabi pa nga nagalain-lain ang guidelines sang ahensya.
