ILOILO CITY – Masobra sa P66 Million ang kantidad nga ginbulig sang Department of Labor and Employment sa mga commercial establishment nga nagsirado bangud sa ginapatuman nga lockdown.
Sa interview sang Bombo Radyo kay Niezel Sabrido, tagpamaba sang Department of Labor and Employment 6, iya ginpahayag nga sa subong, wala na nagabaton sang application ang ahensya bangud nga padayon ang pagproseso sang requirements sang masobra sa 2,900 ka applicants.
Suno kay Sabrido, sa 2,900 ka Small and Mdeium Enterprises nga nagpasa sang application, kapin sa 13,000 ka empleyado ang makabenepisyo.
May kaangtanan naman sa TUPAD BKBK program (Barangay Ko, Bahay Ko Disinfection / Sanitation Project), ginpahayag ni Sabrido nga masobra sa 4,000 ang nagpasa sang application kag sa subong, kapin sa 3,000 ang nahatagan sang approval.
Ang cash assistance suno sa natungdan ang igahatag antes ang Abril 30 kadungan sang pagtapos sang Enhanced Community Quarantine.
