ILOILO CITY – Ginkuha sa tinaga nga Coronavirus ang pangalan sang isa ka lapsag nga ginbun-ag kaina sang aga sa Brgy. Rizal Pala Pala 2, Iloilo City kadungan sang ginapatuman nga weekend block-off.
Sa interview sang Bombo Radyo kay Rowena Zamora, nagasagod sa iloy nga si Ailyn Soliva, iya ginpahayag nga Covid ang ipapangalan sa lalaki nga lapsag apang kun babayi naman ang lapsag, ini ang pagahingalanan kay Corona.
Suno kay Zamora, sa ila na balay naga-istar ang single parent nga si Ailyn humalin sang nailo sa ginikanan samtang may yara naman sang pangabuhi ang iya mga utod.
Ginpahayag ni Zamora nga antes pa man sila makalab-ot sa hospital, ginbun-ag na ni Ailyn ang iya lapsag.
Bangud nga wala sang masakyan tuga sang ginapatuman nga weekend block off, tricycle nga ginakargahan sang talaba ang gingamit sa pagdul-ong kay Ailyn sa hospital.
Nahibalu-an nga si Ailyn ang may yara sang deperensya sa panghuna-huna kag wala nahibalu-an kun sin-o ang amay sang iya anak.
