ILOILO CITY – Daku nga kalipay para sa mag-asawa nga bakery owner ang pagpanghatag sang libre nga tinapay para sa frontliners subong nga may Coronavirus Disease 2019 (COVID-19).
Sa Good Morning Philippines program, ginpahayag ni Paul Saclauso Sapalo, nga negosyo na sang iya pamilya humalin sang una ang paghimu sang siopao kag tinapay.
Bangud sa pila ka mga rason, ginpahayag ni Sapalo nga ila nga ginbuhinan ang ila produksyon kag sang nagligad lang nga tuig, ila na desisyunan nga ibalik sa kinaandan ang ila negosyo.
Antes pa man ang lockdown suno kay Sapalo, nakapamakal na sila sang iya tiayon sang madamo nga ingredients kag agud nga makabulig man sa mga nagakinahanglan, ila nadesisyunan nga magpanghatag sang libre nga tinapay.
Ginpahayag man sang natungdan nga wala sila nagalaum sang kabaylo bangud nga kabubut-on nila nga mag-asawa nga maghatag sang bulig bisan sa simple lamang nga paagi.
