ILOILO CITY – Nagpabutyag sang hibubun-ot ang pila ka residente bangud sa ginapahayag indi hayag nga pagpanghatag sang food packs sa Brgy. Rizal Pala Pala 2, Iloilo City.
Sa interview sang Bombo Radyo sa tagreklamo nga si Ricky, iya ginpahayag nga wala siya nakabaton sang gatas nga naghalin sa Iloilo City Government.
Suno kay Ricky, maka-apat pa lang siya ka beses nga nakabaton sang food packs kun sa diin sa tagsa ka paghatag, tag isa ukon duha ka kilo nga bugas lang ang iya nabaton.
Sa iban nga barangay suno kay Ricky, madamo na nga tagtaganay ang natabo apang sila sa Rizal Pala Pala 2 ang ginatipid sang ila Punong Barangay.
Sa pakamatuod suno sa tagreklamo, madamo ang nabilin nga supply sang bugas sa ila barangay hall.
Sa pagpaathag naman ni Punong Barangay Noel Soliman, wala niya ginatipid ang pagpanghatag sang bugas kag iban nga food items.
Sa pagkamatuod suno kay Soliman, ang nabilin nga supply sang bugas nga yara sa Barangay Hall ang iya nga ginatigana sa tion nga palawigon ang Enhanced Community Quarantine.
Kun may yara sang ginahatag nga food packs kasubong sang gatas, ginpahayag ni Soliman nga iya lang ini nga ginatunga agud nga makabaton ang tanan nga pumuluyo.
