ILOILO CITY – Gin-athag ni Pavia,Iloilo Mayor Luigi Gorriceta nga indi iya mandu nga ibalik sa syudad sang Iloilo ang COVID-19 patient nga taga Brgy. Tagbak, Jaro, Iloilo City.
Ini ang kasunod sang pagsingki ni Iloilo City Mayor Jerry Treñas may kaangtanan sa ginapahayag pagpabalik ni Gorriceta sa Patient no. 49 sa syudad sang Iloilo nga yara sa banwa sang Pavia.
Sa interview sang Bombo Radyo kay Gorriceta, iya ginpahayag nga lubos niya nga ginapangayu-an sang pasaylo kun ano man ang iya nabuhat nga nakatuga sang kaakig ni Treñas.
Suno kay Gorriceta, iya nahangpan nga mahimo stress lang ang rason sang pagsingki ni Treñas apang luyag lang niya athagon nga wala siya nagmandu nga ibalik sa syudad sang Iloilo ang Patient no. 49 nga sa subong, naka hospital quarantine.
Ginpahayag ni Gorriceta nga wala man siya sang mandu nga sugaton sa Brgy. Tagbak ang apat ka mga himata nga naga-istar sa balay sang nasambit nga pasyente.
Sa subong suno sa natungdan, yara sa quarantine facility sa banwa sang Pavia ang apat kag sa iya pagkahibalo, sakay sa pribado nga salakyan ang mga natungdan pabalik sa balay sang COVID-19 patient sa isa ka subdivision sa nasambit nga banwa.
Nagalaum naman ang alkalde nga wala na sang may magdugang nga kaso sang COVID-19 sa banwa sang Pavia.
