ILOILO CITY – Nakapasa na sang updated version sang proposal ang mga proponents sang “exit plan” kay Iloilo City Mayor Jerry Treñas.
Sa interview sang Bombo Radyo kay Prof. Elisa Baliao, isa sa mga proponents sang exit plan, iya ginpahayag nga may yara sang 58 pages ang amo nga updated version sang proposal sa diin nasaad ang mga pagsulundan sa tion nga makadesisyon si Mayor Treñas nga dulaon ang enhanced community quarantine kag baylohan sang “exit plan”.
Suno kay Balliao, ginakonsidera pa ang mga palamangkutanon kag suhestyon gikan sa ad hoc committee kag sa nagkalain-lain nga sektor sa liwat nga pagbukas amat-amat sang mga establisimento.
Ang ad hoc committee ang ginabug-osan sang mga stakeholders kag mga negosyante sa syudad sang Iloilo.
Dugang pa sang natungdan, ang komitiba amo ang naga diskusyon sang ginaduso sang mga proponents kun bala mahimo tumanon ang isa ka butang ukon indi.
