ABU DHABI, UNITED ARAB EMIRATES – Wala sang may ginbaydan sa ospital ang Coronavirus Disease 2019 Survivor nga isa ka Ilongga kag yara sa subong sa United Arab Emirates.
Sa interview sang Bombo Radyo kay Sheila May Perez, COVID-19 survivor direkta sa Abu Dhabi, iya ginpahayag nga Abril 12 sang iya nahibaluan nga nagpositibo siya sa nasambit nga balatian.
Apang antes niya nahibaluan ang iya kondisyon, nakabatyag na siya sang pagpalanakit sang iya lawas, sakit sa ulo kag kabudlay sa pagginhawa.
Suno kay Perez, antes siya gindala sa ospital, gindala siya sa isa ka 5 star hotel kag didto gin isolate.
Nangin madasig lang ang pag negatibo ni Perez sa COVID-19 bangud gina konsidera niya nga ang isa sa mga nagpaayo sa iya nga kondisyon amo ang pag inom niya sang tubig sang ginpabukalan nga luy-a nga may asin.
Pahayag niya, nabuhinan man ang stress nga iya nabatyagan bangud wala na siya sang may ginapanumdom nga balaydan bangud sabat tanan sang gobyerno sang UAE.
Kun wala ginsabat sang gobyerno ang iya bill sa ospital , mahimo nga nagbayad siya sang masobra 7,300 dirham ukon masobra sa P100,000 magluwas pa dira sa hotel nga ginatiniran niya samtang nagapaayo.
Tuman naman nga ginapasalamatan sang Covid-19 survivor ang mga nurse kag doktor sa UAE nga lunsay mga Filipino sa diin tuman ang pagbantay kag pagtatap sa iya.
