ILOILO CITY – Ginakabig sang Department of Health nga isa ka maayo nga balita nga wala sang panibag-o nga kaso sang Coronavirus Disease 2019 (COVID-19) sa Western Visayas.
Ini ang kasunod sang case bulletin nga ginpaguwa sang Department of Health as of April 23, kun sa diin nagapabilin sa 55 ang kumpirmado nga kaso, 11 ang naka recover kag 8 ang patay.
Sa interview sang Bombo Radyo kay Dr. Renilyn Reyes, pinuno sang Public Health Program Development Cluster kag COVID-19 spokesperson sang Department of Health 6, iya ginpahayag nga sa 166 ka laboratory result nga ginpaguwa sang Western Visayas Medical Center, 165 diri ang nagnegatibo.
Ang isa ka positibo suno kay Reyes ang ginapaidalom sa repeat testing rason nga indi ini maisip nga panibag-o nga kaso.
Ang nasambit specimen ang iya sang 28 anyos nga lalaki sa Bacolod City nga may travel history sa Estados Unidos kag ika 14 nga COVID-19 patient sa rehiyon.
Liwat nga magasapol ang Regional Inter-Agency Task Force agud nga mahitso na ang guidelines nga sundon sa repatriation sang Overseas Filipino Workers.
Posible nga buwas nga adlaw, Abril 24, suno kay Reyes, magasapol ang task force agud nga amyendaran ang Resolution No. 12 ukon ang repatriation guidelines.
Kun basehan ang existing guidelines suno kay Reyes, wala nalakip ang Overseas Filipino Workers nga na stranded sa Metro Manila, Cebu kag iban pa nga bahin sang pungsod kundi ang mga na stranded lang halin sa country of origin nga natalana nga magapauli sa Pilipinas.
Sa bahin sang regional level, ginpahayag sang natungdan nga ginatinguhaan sang task force nga masulusyonan ang nasambit nga problema.
