ILOILO CITY – Wala pa sang advisory gikan sa main office ang pamunu-an sang GT Hotel Iloilo tuhoy sa pagbaton sang mga magapauli nga Overseas Filipino Workers.
Ini matapos nga nalakip ang duha ka branches sang GT Hotel Iloilo sa mga pagatiniran sang magapauli nga Overseas Filipino Workers nga na stranded sa Metro Manila kag sa iban pa nga bahin sang pungsod.
Sa interview sang Bombo Radyo kay Charles Fernandez, Food and Beverages Supervisor sa nasambit nga hotel, iya ginpahayag nga sa subong, nagalab-ot sa 130 ka guest ang nagatinir sa hotel kun sa diin 120 diri amo ang call center agents samtang ang nabilin naman amo ang existing guest nga naabutan sang lockdown.
Suno kay Fernandez, ang De Leon branch ang may yara sang 164 person capacity kun sa diin ang tagsa ka kwarto ang may yara sang duha ka bed capacity apang temporaryo anay nga ginpauntat ang food services.
Sa subong suno sa natungdan, magahulat lamang sila sa mangin abiso sang main office tuhoy sa pagbaton sang magapauli nga Overseas Filipino Workers.
