ILOILO CITY – Duha sa tatlo ka panibag-o nga kaso sang Coronavirus Disease 2019 (COVID-19) sa Western Visayas ang may yara sang travel history sa luwas sang pungsod.
Ini ang kasunod sang ginpaguwa nga case bulletin sang Department of Health 6 as of April 24, kun sa diin nagsaka sa 58 ang COVID-19 case sa rehiyon.
Sa interview sang Bombo Radyo kay Dr. Renilyn Reyes, pinuno sang Public Health Program Development Cluster kag COVID-19 spokesperson sang Department of Health 6, iya ginpahayag nga sa 192 ka laboratory results ang ginpaguwa sang Western Visayas Medical Center, 187 ang nagnegatibo kun sa diin lima ang ginpaidalom sa repeat testing.
Suno kay Reyes, lima man ang nagpositibo kun sa diin 3 diri ang panibag-o nga kaso kag duha naman ang ginpaidalom sa repeat testing.
Nagsaka sa 14 ang naka recover matapos nga tatlo ang nagdugang sa listahan samtang nagapabilin sa gihapon sa 8 ang patay.
Ang Patient no. 56 amo ang 38 anyos nga lalaki sa Silay City, Negros Occidental, nagapaidalom sa facility quarantine kag may travel history sa Netherlands.
Ang Patient no. 57 amo ang 50 anyos nga lalaki sa Candoni, Negros Occidental, nagapaidalom sa facility quarantine kag may travel history sa Finland.
Ang Patient no. 58 naman amo ang 33 anyos nga babayi sang Lambunao, Iloilo, nagapaidalom sa home quarantine kag may close contact sa iya mga himata nga COVID-19 patients sa nasambit nga banwa.
