ILOILO CITY – May yara na sang inisyal nga suhestyon ang Finance Committee may kaangtanan sa economic status sang syudad sang Iloilo.
Ini matapos nga nalakip ang Iloilo City sa high risk areas nga gintumod sang Inter-Agency Task Force kun sa diin subject for re-checking pa kun bala palawigon tubtub sa Mayo 15 ang Enhanced Community Quaratine.
Sa interview sang Bombo Radyo kay Iloilo City Mayor Jerry Treñas, iya ginpahayag nga lakip sa ginduso nanday City Treasurer Jinny Hermano kag City Budget Officer Ninda Atinado amo ang pagdula sang capital outlay, padula sang sports activities, pagdula sang foreign travel sang mga empelyado sang Iloilo City Government kag ang pagbuhin sang numero sang job hire.
Suno kay Treñas, mahimo nga sa masunod nga semana, makapasa na sang full proposal sanday Hermano kag Atinado nga amo ang nagabug-os sang Finance Committee.
Sa subong suno kay Treñas, 60% sa kita sang syudad ang naghalin sa Local Income Tax samtang 40% naman ang Internal Revenue Allotment kag indi man mahinago nga may yara sang negatibo nga epekto ang Coronavirus Disease 2019 (COVID-19) sa ekonomiya sang syudad.
