JAPAN – Nag-angkon sang nanari-sari nga reaksyon ang ginaduso sang alkalde sang Osaka City sa Japan nga ang mga lalaki na lang ang magpanindahan subong nga may yara sang Coornavirus Disease 2019 (COVID-19).
Ginduso ni Osaka City Mayor Ichiro Matsui nga ang mga lalaki lamang ang dapat nga magpamalaklon bangud nga ang mga babayi ang tuman ka dugay magpili sang dapat baklon kag nagatuga sang pagginutok.
Suno kay Bombo International Correspondent Josel Palma, indi na bag-o sa Japan nga ang mga lalaki ang nagapamalaklon apang ini ang labing una nga kahigayunan nga may isa ka public official nga nagmandu nga himuon ini nga mandatory.
Ang nasambit nga pahayag ni Matsui ang nagtulod sa kilala nga Japanese journalist nga si Shoko Egawa nga mag-post sa social media sang “people who know nothing about daily life shouldn’t make comments.”
Ang nasambit nga Tweet suno kay Palma ang nag-angkon sang madamo nga shares kag comments kun sa diin kalabanan ang nagpabor sa pahayag ni Egawa.
Ginpahayag man ni Palma nga ang Osaka ang ginpaidalom sa state of emergency humalin sang Abril 7 bangud sa nagataas nga numero sang COVID-19.
Sang nakaligad nga adlaw, may yara sang nagdungka nga Italian Cruise Ship sa port of Nagasaki kun sa diin ang kalabanan nga mga crew ang nagpositibo sa nasambit nga virus.
Sa subong, naglab-ot na sa 12,429 ang COVID-19 case sa Japan, 2,408 ang naka recover samtang 328 ang patay.
