ILOILO CITY – Nagalaum ang Iloilo Science and Technology University nga mangin madinalag-on ang pagpanalawsaw tuhoy sa paghimo sang prototype equipment nga magamit sang medical frontliners may kaangtanan sa Coronavirus Disease 2019 (COVID-19).
Sa Good Morning Philippines program, ginpahayag ni Dr. Raul Muyong, presidente sang Iloilo Science and Technology University, nga lakip sa ginaduso sang reasearch team amo ang paghimo sang prototype ventilators, Ultraviolet C (UVC) sterilizer kag swab booth.
Suno kay Muyong, ginapreparahan sa subong ang rebound sa tion nga magsaka ang demand sa nasambit nga equipment sa bulan sang Hunyo tubtub Oktubre.
Ang UVC sterilizer suno kay Muyong ang makabig nga essential para sa frontliners agud nga magamit liwat ang Hazardous Material Suits (hazmats) ilabi na subong nga amat-amat nga nagakulang ang supply sang protective suits.
Ginpahayag ni Muyong nga mismo ang Commission on Higher Education ang naghingyo sini kag bilang solo nga unibersidad nga may yara sang fabrication laboratory sa Western Visayas, ginpahayag ni Muyong nga katungdanan nila nga magbulig sa gobyerno paagi sa paghimo sang equipment kasubong sang protective suits, facemask, face shields, ventilators, sterilizer kag aerosol boxes.
Apisar sang bulig sang nagkalain-lain nga ahensya sang gobyerno, ginpahayag sang natungdan nga daku sa gihapon nga pagpanghangkat kun sa diin magakuha sang materyal nga pagagamiton.
Samtang, wala pa sang schedule kun san-o maga-umpisa ang enrollment kag ang klase sa Iloilo Science and Technology University.
Buwas, Abril 27, magapatigayon sang pagsinapol ang tanan nga opisyal sang unibersidad agud nga istoryahan ang tuhoy diri.
May kaangtanan sa pagbukas sang klase, mangin madatory naman ang pagsuksok sang facemask sa tanan nga estudyante kag faculty.
Mismo ang pamunu-an sang unibersidad ang magapanghatag sang libre nga washable facemask.
