ILOILO CITY – Behavioral changes ang pinakamalala nga epekto sang sexual abuse ilabi na kun ang biktima ang wala sang kaisog nga magpangayo sang bulig.
Sa Good Morning Philippines program, ginpahayag ni Japhet Grace Moleta, Advocacy Coordinator sang Cameleon Association Inc., nga ang sexual abuse ang mahimo nga matabo sa sulod sang balay ilabi na subong nga may yara sang Enhanced Community Quarantine.
Suno kay Moleta, may kaso man sang sexual abuse nga involved ang magpamilya kasubong sang amay kag anak nga naga-istar sa isa lang ka balay.
Ginpahayag ni Moleta nga ang iban sa mga biktima ang wala sang kaisog ukon kahigayunan nga makapanugid kun ano ang natabo sa ila bangud sa pila ka sirkumstansya.
Ang kasubong nga krimen ang indi dapat pagtaguon kag ikahuya bangud nga ini ang magaresulta sa hinali nga pagbag-o sang paminatasan, pag-angkon sang pilas, pagsakit sang kinatawo, pag-angkon sang Sexually Transmited Diseases, Cervical cancer kag kun kaisa nagaresulta sa kamatayon.
Agud nga ini ang malikawan, importante ang giya sang ginikanan ukon guardian kag ang disiplina para sa mga kabataan.
Bilang hugot nga kampanya agud nga matapna ang sexual abuse, mahimo nga magpakig-angot sa numero sang Department of Social Welfare and Development Office sa 503-37-97 ukon sa 09085951410 kag sa Police Regional Office 6 – Women and Children Protection Desk sa 09218009941.
