ILOILO CITY – Ginkumpirma sang pamilya nga nagtaliwan na ang Ilonggo Nurse nga nagpositibo sa Coronavirus Disease 2019 (COVID-19) sa Dubai.
Sa exclusive interview sang Bombo Radyo kay Heidi Jimenea, iloy sang Ilonggo Nurse, iya ginpahayag nga tuman ang iya pagpasalamat sa tanan nga nagpalab-ot sang pagpangamuyo para sa iya anak nga si Marlon.
Suno kay Jimenea, 21 ka adlaw nga nagpakigbato ang iya anak tubtub nga ginbawi-an sang kabuhi kaina sang kaagahon (Abril 26).
Ginpahayag ni Jimenea nga masakit para sa iya bilang iloy nga mabalitaan nga patay na ang iya anak kag indi man siya makapadulong sa Dubai bangud sa ginapatuman nga lockdown.
Sa pihak sini, luyag sang iloy nga dal-on diri sa Pilipinas ang abo sang Ilonggo Nurse rason nga nagapangayo siya sang bulig sa gobyerno kun paano ini matigayon.
Nahibalu-an nga ang tiayon kag ang anak ni Marlon ang nagnegatibo sa COVID-19.
Nahibalu-an nga ang pamilya sang Ilonggo Nurse ang nagatinir sa syudad sang Iloilo.
