ILOILO CITY – Ginkadismaya ni Mayor Jerry Treñas ang kakulang sang koordinasyon sang Regional Disaster Risk Reduction and Management Council tuhoy sa pagpapauli sa Overseas Filipino Workers sa syudad sang Iloilo.
Ini ang kasunod sang ginpaguwa nga official statement sang Regional Disaster Risk Reduction and Management Council tuhoy sa 234 ka repatriated Overseas Filipino Workers nga ginalauman nga maga-abot sa Iloilo City kag Bacolod City sa Abril 29.
Sa interview sang Bombo Radyo kay Treñas, iya ginpahayag nga mas maayo nga may yara sang close coordination sa tunga sang concerned agencies agud nga wala sang pagsalangisag nga matabo.
Suno kay Treñas, apisar nga nagapanindugan ang Maritime Industry Authority kag pila ka ahensya sang gobyerno nga may yara sang ginpadala nga sulat sa Iloilo City Government apang wala siya sang ihibalo tuhoy diri.
Ginpahayag ni Treñas nga wala siya sang may mahimo kundi batunon ang mga Ilonggo OFWs nga nalakip sa batch nga sakay sa isa ka barko halin sa Metro Manila.
Pag-abot diri sa syudad sang Iloilo, ginpahayag sang alkalde nga ipahamtang sa isa lang ka quarantine facility ang OFWs kag kun may magpositibo sa sulod sang 14-day quarantine, iseparar gid ang COVID-19 positive agud nga indi na maglaton ang virus.
