ILOILO CITY – Welcome development para kay Mayor Jerry Treñas ang indi pagkalakip sang Iloilo City sa mga lugar nga may quarantine extension tubtub sa Mayo 15.
Nahibalu-an nga santo sa pahayag ni Presidential Spokesperson Atty. Harry Roque, lakip sa mga lugar nga may extension sang Enhanced Community Quarantine amo ang National Capital Region, Central Luzon (magluwas sa Aurora), CALABARZON, Pangasinan, Benguet, Baguio City, Iloilo Province, Cebu Province, Cebu City kag Davao City.
Sa interview sang Bombo Radyo kay Treñas, iya ginpahayag nga isa ka maayo nga balita nga wala nalakip ang Iloilo City sa mga lugar nga ipaidalom sa Enhanced Community Quarantine umpisa sa Mayo 1.
Bangud sini suno kay Treñas, ipaidalom na lang sa General Community Quarantine ang bug-os nga syudad kun sa diin lauman nga mabuhinan ang quarantine restrictions nga ipatuman.
Ginpahayag sang alkalde nga nakahanda ang Iloilo City Government sa panibag-o nga pagpanghangkat tubtub nga mabalik sa kinaandan ang sitwasyon sa syudad.
Nahibalu-an nga santo sa guidelines, mahimo na nga pahanugutan ang amat-amat nga pagbalik sang trabaho kag ang transportasyon sa mga lugar nga yara sa General Community Quarantine apang may yara sa gihapon sang quarantine protocol nga dapat sundon.
Samtang, naistorya na sang alkalde si National Task Force Covid-19 chief implementer Carlito Galvez may kaangtanan sa kasugtanan sa tunga sang Local Government Unit kag sang Inter-Agency Task Force tuhoy sa pagpapauli sang mga Overseas Filipino Workers.
Kabahin diri suno kay Treñas amo nga antes makapauli ang mga Overseas Filipino Workers, kinahanglan anay nga magpaidalom sa 14-day quarantine kag sa COVID-19 test.
Antes ang repatriation, ginpahayag sang alkalde nga kinahanglan anay nga magpakig-angot sa iya ang task force indi kasubong sa batch sang OFWs nga natalana nga mag-abot sa Panay, buwas, Abril 29.
