ILOILO CITY – Gin-pakigbahin sang Western Visayas Medical Center ang ila proseso sa pag-abot sang mga specimen sa ila nga laboratory.

Ini ang kasunod sang mga reklamo sang pila ka mga local chief executives nga mahinay ang pagpaguwa sang resulta sang Coronavirus Disease 2019 cases.

Sa interview sang Bombo Radyo kay Dr. Stephanie Abello, Chief Pathologist sang Western Visayas Medical Center Laboratory, iya ginpahayag nga ang mga specimen nga naga abot antes 1:00 sa hapon amo ang gina proseso.

Suno kay Abello, kada adlaw may yara sang average nga 250 ka mga specimen ang ila nga gina proseso apang mahimo man sila makabaton tubtob 500 ka mga specimen.

Tatlo ka mga PCR machine ang naga operate agud nga ma test ang mga specimen kag kada machine ang maga akomodar sang 93 ka mga specimen.

Indi nagakadapat nga buksan ang specimen sa diin kinahanglan yara ini sa negative pressure room agud nga indi man malatnan ang mga medical personnel.

Buksan lamang ang specimen kun yara na ini sa inactivation room.

Kun may yara sang 100 ka mga specimen panubo, makuha sa tatlo tubtob apat ka oras ang pag check kun bala may yara sang virus ang amo nga specimen apang kun magsobra sa 100, nagalab-ot kun kaisa sa anom ka oras ang pag-check.

Sa inactivation room, gina-init ang specimen agud nga ma inactivate ang virus kag ini ang gina isa-isa amo nga mauti ini para sa ila sa diin nagalab-ot sa duha tubtob apat ka oras.

Kun kaisa, nagadugay man ang pag proseso sang specimen bangud naga invalid ang resulta sini — mahimo nga wala nakuha ang nagadapat makuha sa isa ka tawo sang ginpaidalom ini sa PCR testing rason nga kinahanglan liwaton ang test.

Gin-ako man ni Dr. Abello nga indi lang iya sang Western Visayas nga mga specimen ang ila nga ginaproseso kundi lakip man ang anom ka mga munisipalidad nga kabahin sang Region IV-B (MIMAROPA) kag Masbate.

Gin-athag man sang natungdan nga naka separar ang Tubercolosis culture lab sa COVID-19 laboratory baliskad sa mga nagagguwa nga pahayag nga gina proseso ang mga ini sa isa lang ka laboratory.

Dugang pa ni Dr. Abello, gina-yuhom na lang nila nga mga medical technologists ang mga kritisismo nga ginahaboy sa ila.