ILOILO CITY– Ginapangitaan sang paagi sang Iloilo City Government nga makakita sang dugang nga isolation facility para sa mga magapauli nga Overseas Filipino Workers kag iban pa nga magapauli sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagapangayo sang isa ka libo nga isolation rooms ang Department of the Interior and Local Government para sa mga ginapaabot pa nga mga OFWs.
Pahayag pa ni Treñas, ang mga asymptomatic covid positive ang igapahamtang sa St. Therese Hospital, samtang ang Jubillee Hall naman ang pagagamitun sang mga nag-alalabot kag mga naka direct contact sa mga covid-positive patient.
Nagahingyo man si Treñas sa Overseas Workers Welfare Administration kag sa Inter-Agency Task Force nga magsunod sa protocol sa pagpapauli sang mga Overseas Filipino Workers.
Samtang ginpahayag man ni Treñas nga sa mga Ilonggo nga luyag magpauli kag na stranded magpakig-angot lang sa Department of Tourism kag sa Inter-Agency Task Force bangud ang duha ka ahensya ang nagapatigayun sang pagpauli sang mga lokal nga na stranded.
