ZARRAGA, ILOILO – Napaidalom na sa quarantine ang 14 ka mga naka-angkon sang close contact sa personnel nga nagpositibo sa Coronavirus Disease 2019 (COVID-19) sa Zarraga, Iloilo.
Sa interview sang Bombo Radyo kay Mayor John Tarrosa, iya ginpahayag nga ang 14 ang ginalakipan sang kaupod sa balay kag ang mga kasilingan sang BJMP personnel nga nagapabilin nga asymptomatic.
Suno kay Tarrosa, ang 14 ang gintumod sa tatlo ka kategorya nga ginalakipan sang high risk, moderate risk kag low risk kun sa diin ginpaidalom na sa lockdown ang sundivision kun sa diin nagapauli ang pasyente.
Ginpahayag ni Tarrosa nga daku nga pagpanghangkat para sa mga pumuluyo sang subdivision bangud nga apektado ang ila trabaho bangud sa ginapatuman nga lockdown.
Samtang, nagsulat na ang alkalde sa tiglikom sang Department of Social Welfare and Development kag sang Department of the Interior and Local Government agud hingyuon ang extension sa pagpanghatag sang Social Amelioration Program.
Sa pagpaathag ni Tarrosa, may kapin sa 10% pa nga wala nahatagan sang P6,000 nga ayuda sa bug-os nga banwa sang Zarraga.
Ginpasiguro naman sang natungdan nga mahatagan sang cash assistance ang tanan nga benepisyaryo sa labing madali nga tion.
