ILOILO CITY – Ginahulat na lang sang mga Overseas Filipino Workers ang mangin abiso sang Department of Health kun bala makapauli na sila sa tion nga magnegatibo sa swab test ukon kinahanglan gid nga tapuson ang 14-day quarantine sa syudad sang Iloilo.
Sa interview sang Bombo Radyo kay Benjie Magbanua, isa sa mga nagpauli nga Overseas Filipino Worker, iya ginpahayag nga ginpaidalom na sila sa swab test agud masigurado kun pila sa ila ang positibo kag pila naman ang negatibo.
Suno kay Magbanua, kada isa sa ila ang may kaugalingon nga kwarto sa ginatiniran nga hotel kag indi sila mahimo nga makaguwa.
Ginpahayag ni Magbanua nga sang Marso 18 pa siya nag-abot sa Metro Manila kag nagtinir sa hotel kun sa diin ang ila mismo kompaniya ang nagbayad sang accomodation.
Sa subong suno sa natungdan, wala pa sang abiso kun bala san-o gid sila makapauli sa ila tagsa ka balay.
Nahibalu-an nga siyam ka OFW ang nagpositibo sa rapid test kag ginpaidalom sa confirmatory test kun sa diin pito sa ila ang residente sang Iloilo City samtang duha naman ang residente sang Guimaras.
