ILOILO CITY – Padayon ang Oplan Sita sang Public Safety and Transportation Management Office sa mga driver sang salakyan nga wala sang quarantine pass.
Sa interview sang Bombo Radyo kay Jeck Conlu, pinuno sang Public Safety and Transportation and Management Office, iya ginpahayag nga sa subong, wala pa sang may napasakaan sang kaso nga violators sa syudad sang Iloilo apang ang iban sa mga nadakpan ang i-blotter sang Philippine National Police.
Suno kay Conlu, kalabanan sa ginasaway amo ang wala sang dala nga quarantine pass, wala nagasuksok sang facemask kag wala nagasunod sa physical distancing.
Ginpahayag ni Conlu nga mas istriktuhon pa ang pagpatigayon sang Oplan Sita tubtub sa Mayo 15.
Samtang, amat-amat naman nga nagadamu ang na impound nga tricycle, trisikad kag e-bike sa La Paz plaza.
May kaangtanan diri, ginpahayag ni Conlu nga daku nga pagpanghangkat para sa Public Safety and Transportation Management Office ang pagpanakop sa mga dungol nga driver apisar nga gindumili-an ang pagbyahe sang mga Public Utility Vehicle.
Sa subong suno sa natungdan, wala siya sang may mahimo kundi pangdakpon ang mga driver nga wala nagasunod sa quarantine protocol.
