ILOILO CITY – May yara sang istrikto nga protocol nga ginaduso sang Ad Hoc Committee may kaangtanan sa pagpauli sang mga Ilonggo Overseas Filipino Workers sa syudad sang Iloilo.
Ini ang kasunod sang pagpositibo sang siyam ka mga Overseas Filipino Workers sa ginpatigayon nga rapid test.
Sa interview sang Bombo Radyo kay Iloilo City Councilor Alan Zaldivar, chairman sang Committee on Health kag miyembro sang Ad Hoc Committee, iya ginpahayag nga sa mga masunod nga batch sang magapauli nga Overseas Filipino Workers, kun tani, napaidalom na sila sa Polymerase Chain Reaction test kag kinahanglan nga may yara sang dala nga health certificate.
Ang mga taga probinsya sang Iloilo ukon Guimaras suno kay Zaldivar ang gilayon nga ideretso sa ila tagsa ka mga lugar agud magpaidalom sa quarantine kag sa COVID-19 test.
Ginpahayag man ni Zaldivar nga agud nga makasiguro, ang mga taga syudad sang Iloilo ang liwat naman nga ipaidalom sa test agud makumpirma ang nauna nga resulta.
