ILOILO CITY – May yara na sang sub task group nga gintukod ang Regional Inter-Agency Task Group may kaangtanan sa masunod nga batch sang Overseas Filipino Workers nga maga-abot sa Panay sa masunod nga semana.
Ini ang kasunod sang pagsinapol kun sa diin wala napunggan ni Iloilo City Mayor Jerry Treñas kag ni Office of Civil Defense 6 Director Jose Roberto Nuñez nga magpangakig sa Overseas Workers Welfare Administration kag Maritime Industry Authority bangud sa pagpabaya sa mga nagpauli nga OFW sa syudad sang Iloilo.
Sa interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga ang sub task group ang pangunahan sang Maritime Industry Authority kag miyembro man ang Overseas Workers Welfare Administration.
Suno kay Atty. Villa, katungdanan sang sub task group nga tutukan ang pagpatigayon sang repatriation agud nga wala sang mangin problema.
Ginpahayag ni Atty. Villa nga kabahin man sa gihapon sang sub task group ang Local Government Unit kag lakip na ang iban pa nga concerned agencies kun sa diin ang kada isa ang may yara sang katungdanan.
Wala lang nahibalu-an sang natungdan kun pila ang exact number sang mga magapauli nga Overseas Filipino Workers apang ginabanta nga kapin sa 300 ang nalakip sa masunod nga batch.
