ILOILO CITY – Nagbulig na ang Iloilo Provincial Health Office sa delivery sang pagkaon kag iban pa nga relief goods sa mga Ilonggo Overseas Filipino Workers nga temporaryo nga nagatinir sa isa ka hotel sa syudad sang Iloilo.
Sa interview sang Bombo Radyo kay Dr. Ma. Socorro Quiñon, Provincial Health Officer, iya ginpahayag nga kun delivery ang pagahambalan, ang Overseas Workers Welfare Administration kun tani ang may katungdanan diri.
Suno kay Quiñon, bangud kasubong nga nagapang alang-alang ang nasambit nga ahensya sang gobyerno, boluntaryo nga magabulig ang Provincial Health Office sa pagdala sang pagkaon kag iban pa nga kinahanglanon sang mga Ilonggo OFW.
Ginpahayag ni Quiñon nga ang mga nagadeliver sang relief goods ang kinahanglan nga magsuksok sang Personal Protective Equipment agud masiguro nga wala na sang local transmission kasunod sang pagpositibo sang pila ka OFWs sa Coronavirus Disease 2019 (COVID-19).
