ILOILO CITY – Gin-athag ni Iloilo City Lone Distric Rep. Jam Jam Baronda nga nagbulig lang siya sa pagpatigayon sang repatriation sang mga Overseas Filipino Workers agud nga makapauli sa Panay.
Ini matapos nga isa ang pangalan ni Baronda sa mga namitlangan nga amo ang nagpatigayon sa repatriation apang sa subong nga may problema, wala na ang iya presensya.
Sa interview sang Bombo Radyo kay Baronda, iya ginpahayag nga ang pagpapauli sa mga OFWs ang desisyon sang National Inter-Agency Task Force apisar sang pagpamatok sa lokal nga lebel.
Suno kay Baronda, nagpakig-angot siya kay Secretary Carlito Galvez, Jr., ang chief implemeter sang National Inter-Agency Task Force, kag sa mga ahensya sang gobyerno nga kun mahimo, ipaiway anay ang repatriation sang una nga batch sang OFW.
Ginpahayag ni Baronda nga ang impormasyon nga iya nabaton ang gilayon man niya nga ginapahibalo kay Iloilo City Mayor Jerry Treñas bilang bulig sa alkalde kag sa Regional Inter-Agency Task Force.
Bilang public servant suno sa natungdan, apisar nga wala nadayon ang repatriation sang una nga batch, naghatag siya sang bulig kasubong sang pagkaon kag tubig para sa mga OFW nga na stranded sa Metro Manila.
