SIERRA LEONE – Daku ang nabulig sang natun-an sang mga health expert sa pagtapna sang Ebola outbreak sa pagpatigayon sang Covornavirus Disease 2019 (COVID-19) response sa Sierra Leone.
Suno kay Bombo International Correspondent Dickya Labicane, medical personnel nga nabase sa Freetown sa Sierra Leone, ang Ebola kag ang COVID-19 ang pila lamang sa balati-an nga nagtuhaw sa nasambit nga pungsod.
Ginpahayag ni Labicane, nga antes pa man ang labing una nga COVID-19 case sa Sierra Leone, ginpatuman na ang airspace lockdown kun sa diin madamo nga pasahero ang naapektuhan.
Sa subong, naglab-ot sa 155 ang kumpirmado nga COVID-19, 21 ang naka recover kag walo ang patay bangud sa nasambit nga virus rason nga ginatutukan sang gobyerno ang pagpahamtang sang health centers, depende sa kondisyon sang pasyente.
Magluwas diri, ginpahayag ni Labicane nga ginapangitaan man sang paagi sang gobyerno ang pagpangita sang madamo nga ventilators agud nga may magamit ang mga pasyente nga nabudlayan sa pagginhawa kag ginatutukan man ang pagpahangop sa publiko kun ano ang COVID-19.
Apisar sang nanari-sari nga kultura kag religious practice sa Sierra Leone, ginasunod sang tanan ang protocol sa paglubong sang bangkay sang COVID-19 patient agud nga indi na magdamu ang kumpirmado nga kaso.
Bangud sa pagdamu sang COVID-19 patient, ginpahayag sang natungdan nga bisan ang operasyon sang organisasyon kun sa diin siya konektado ang naapektuhan bangud nga kalabanan sa mga international volunteer ang kinahanglan nga magbalik sa ila tagsa ka mga lugar.
Ang mga kakulangan sang sang natabo ang Ebola ang ginapun-an sang gobyerno sang Sierra Leone paagi sa pagpatigayon sang COVID-19 response.
Kasubong sa kalabanan nga mga pungsod, istrikto man ang ginapatuman ang curfew hours, pagsuksok sang facemask, pagsunod sa physicial distancing kag ang pagpahamtang sang washing facility sa tagsa ka commercial establishment.
