TUBUNGAN, ILOILO – Padayon ang Project Bulig sang mga manunudlo sang Adgao-Tagpuan-Ingay Elementary School sa Tubungan, Iloilo agud nga mapadayon ang pagtudlo sa kapin 300 ka mga estudyante apisar sang Enhanced Community Quarantine.
Sa Good Morning Philippines Program, ginpahayag ni Arnel Maderal, Principal sang Adgao-Tagpuan-Ingay Elementary School, nga nag-umpisa ang Project Bulig sang ginpauntat ang klase bangud sa Enhanced Community Quarantine kag kalabanan ang wala man sang access sa internet.
Suno kay Maderal, ang nasambit nga inisyatibo ang gintukod agud nga mapadayon sa gihapon ang pagtuon sang 297 ka mga estudyante humalin sa Kinder tubtub sa Junior High School.
Ginpahayag ni Maderal nga sila mismo nga mga manunudlo ang nagapadulong sa balay sang mga estudyante agud nga magtudlo kag magdul-ong sang learning materials kun sa diin ang kwarta nga gingasto para diri ang naghalin mismo sa ila bulsa.
Umpisa sang Mayo 1 suno kay Maderal, ginpatuman na ang Phase 2 sang Project Bulig samtang sa Hunyo tubtub Hulyo naman ang Phase 3.
May yara sang follow-up activities nga ginapatigayon agud nga masiguro nga nahangpan sang mga estudyante ang ginatudlo sa ila sa bulig man sang ila ginikanan samtang may yara naman sang specific activities nga ginahatag para sa mga may yara sang mahina nga development.
Magluwas diri, may yara man sila sang ginahatag nga relief goods para sa identified families sang mga estudyante.
