MANILA– Naghatag sang sabat ang Overseas Workers Welfare Administration Manila, tuhoy sa mga reklamo nga ginapalab-ot sang stranded nga mga Overseas Filipino Workers.
Sa interview sang Bombo Radyo kay Jay Teves, Officer-in-Charge sang Advocacy and Social Marketing Division sang OWWA Manila, iya ginpahayag nga nagakadapat nga mismo ang manning agency sang mga OFW’s ang magapakig-angot sa ila.
Suno kay Teves, kun nagapabaya ang tagsa ka mga manning agency, mahimo makatawag sa ila hotline nga 1348 ang mga Overseas Filipino Workers, agud magpahibalo kun diin ang mga ini nagatiner sa Manila, lakip na ang pangalan sang dormitory kag pangalan sang manning agency.
Pahayag pa ni Teves, sa tion nga makatawag na ang mga OFW sa ila kag nakahatag sang nagakaigo nga impormasyon, pagakadtuan man ang mga ini sang personnel sang OWWA agud hibaluon ang ila sitwasyon, kag makahatag man sang ayuda, kaangay sang pagkaon.
Dugang pa sang natungdan, bukas man ang ila hotline agud magbatun sang tawag sang mga Overseas Filipino Workers.
