KUWAIT – Nagapasalamat ang Overseas Filipino Workers sa Kuwait sa nangin pahayag ni Presidente Rodrigo Duterte nga himuon nga voluntary ang pagbayad sang premiums sa Philippine Health Insurance Corporation.
Suno kay Bombo International Correspondent Oliver Diong, isa sa Board of Directors sang Filipino Community sa Kuwait, daku nga bulig para sa ila ang pagbawi sang balayran sa mandatory PhilHealth premiums kag ang 3% nga balayran sa kada bulan ang daku na nga kantidad nga mabuhin sa ila monthly salary.
Ginpahayag ni Diong nga magluwas sa mataas nga balayran, ginhimu nga requirement sa pagkuha sang Overseas Employment Certificate ang pagbayad sang PhilHealth premiums kag may yara man sang penalty sa tion nga indi makabayad sa deadline.
Sa subong suno kay Diong, isa siya sa linibo nga Overseas Filipino Workers nga nagpirma sa online petition batok sa mandatory nga pagbayad sang PhilHealth premiums kag may yara man sila sang open letter nga luyag ipalab-ot kay Presidente Duterte kag kay Sen. Bong Go nga amo ang Chairman sang Committee on Health sa Senado.
Apisar nga voluntary na lang ang PhilHealth premiums, ginpahayag sang natungdan nga mabudlay sa gihapon para sa Overseas Filipino Workers nga maluyag magkuha sang health insurance.
May kaangtanan naman sa Coronavirus Disease 2019 (COVID-19) sa Kuwait, ginpahayag ni Diong nga nagalab-ot na sa 5,278 ang kumpirmado nga kaso, 1,947 ang naka recover kag 40 ang ginbawi-an sang kabuhi.
Nagalab-ot naman sa 10,000 Kuwait Dinar ukon P1.7 million ang multa sa madakpan nga nagalapas sa curfew humalin 4:00 sa hapon tubtub 8:00 sa aga kag may yara man sang pagkapreso nga silot.
Naglab-ot naman sa 30,000 ka Overseas Filipino Workers ang apektado sang No Work No Pay policy bangud sa ginapatuman nga lockdown.
