STO NIÑO SUR AREVALO, ILOILO CITY– Nagapabilin sa ila tagsa ka panimalay ang mga residente sang Brgy. Sto. Niño Sur, Arevalo, Iloilo City, matapos ginpaidalom sa extreme enhanced community quarantine ang lugar kasunod sang dugang nga apat ka COVID-19 positive case.
Sa interview sang Bombo Radyo kay Anne Pelobello Tabat, residente sang nasambit nga barangay, iya ginpahayag nga ginapaiway na nila ang pag-gwa sa ila balay.
Suno kay Tabat, kahapon nga adlaw, sang temprano pa, nakatigayun siya sa pagbakal sang ila kinahanglanon kag sang gab-i na, nagsugod na ang mas ginhugot nga pagpatuman sang quarantine.
Samtang, sa interview sang Bombo Radyo kay Sheena Sumbilon, residente man sang nasambit nga lugar, iya ginpahayag nga may nagakadto sa tagsa ka mga balay kag nagapanglista sang mga magapaidalom sa COVID-19 testing.
Apang ang pagpatigayun sang testing suno sa natungdan ang nahamtang mismo sa ila barangay hall.
Pahayag pa ni Sumbilon, posible nga unahon sa pag-test ang mga senior citizens sang barangay antes ang iban nga mga residente.
