ILOILO CITY – Nadugangan sang isa ang kumpirmado nga kaso sang Coronavirus Disease 2019 (COVID)19 sa Western Visayas kun sa diin ang kabug-usan nga numero ang naglab-ot na sa 92.
Suno kay Dr. May Ann Sta. Lucia, pinuno sang Health Promotion Cluster kag COVID-19 spokesperson sang Department of Health 6, ang patient no. 92 amo ang 32 anyos nga lalaki nga isa ka Overseas Filipino Worker sang Pavia, Iloilo kag nagapaidalom na sa facility quarantine.
Apisar sang pagsaka sang kumpirmado nga kaso, may tatlo naman ka mga pasyente nga nagdugang sa mga naka recover kag ini amo sanday Patient no. 14 nga amo ang 28 anyos nga lalaki sa Bacolod City, Patient no. 36 nga amo ang 25 anyos nga babayi sang Barotac Nuevo, Iloilo kag Patient no. 40 nga amo ang 44 anyos nga lalaki sang La Paz, Iloilo City.
Sa 411 ka laboratory results nga ginpaguwa sang Western Visayas Medical Center as of May 7, 408 ang nagnegatibo kun sa diin ang tatlo ang ginpaidalom sa repeat testing.
Duha ang nagpositibo apang isa lang ang panibag-o nga kaso samtang ang isa ang ginpaidalom sa repeat testing.
Nagsaka sa 34 ang mga naka recover samtang nagapabilin sa gihapon sa 10 ang patay.
Sa pangkabug-usan, anum ang COVID-19 cases sa Aklan, 14 sa Antique, lima sa Capiz, 18 sa Iloilo, 2 sa Negros Occidental, siyam sa Bacolod City, 15 sa Iloilo City kag 23 ang nagpositibo sa repatriates.
