ILOILO – May pila ka na request nga nabaton ang Iloilo Provincial Government may kaangtanan sa returning residents sang Iloilo.
Ini ang kasunod sang pagpaguwa sang guidelines ni Iloilo Gov. Arthur Defensor Jr. tuhoy sa requirements agud nga makapauli ang mga local strandees.
Sa interview sang Bombo Radyo kay Dr. Jerry Bionat, pinuno sang Provincial Disaster Risk Reduction and Management Office, iya ginpahayag nga may yara sang nagkalain-lain nga requirements nga dapat ipasa ang local strandees depende sa lugar nga ila ginhalinan.
Suno kay Bionat, para sa mga local strandees nga halin sa lugar nga napaidalom sa Enhanced Community Quarantine, dapat nga magpasa sang mga masunod:
-Resulta sang RT-PCR test, Certification nga nakapaidalom sa 14-day quarantine kag negatibo sa COVID-19 gikan sa Rural Health Officer sang lugar nga ginhalinan, Certificate of Acceptance sa lugar nga pauli-an, Certification halin sa Gobernador nga nagapahanugot sa returning residents kag nagakadapat nga magpaidalom sa 14-day quarantine sa common quarantine facility pag-abot sa lugar nga paulian.
Para naman sa mga local strandees nga halin sa mga lugar nga ginpaidalom sa General Community Quarantine, yari ang mga requirements:
-Certificate of Acceptance, Certification nga nakapaidalom sa 14-day quarantine kag negatibo sa COVID-19 gikan sa Rural Health Officer sang lugar nga ginhalinan, Certification halin sa Gobernador nga nagapahanugot sa returning residents kag nagakadapat nga magpaidalom sa 14-day quarantine sa common quarantine facility pag-abot sa lugar nga paulian.
