ILOILO CITY – Ginahulat na lang ang resulta sang swab test sang mga Overseas Filipino Workers nga nagpauli subong nga adlaw, Mayo 9, sa syudad lakip na sa probinsya sang Iloilo kag Guimaras.
Sa interview sang Bombo Radyo kay Iloilo City Mayor Jerry Treñas, iya ginpahayag nga 13 ka Ilonggo OFWs nga residente sang syudad ang nagatinir sa isa ka hotel samtang wala pa ang resulta sang swab test.
Suno kay Treñas, nagatinir man sa nasambit nga hotel ang mga OFW nga residente sang probinsya sang Iloilo kag Guimaras kun sa diin may yara sang pagkaon kag tubig nga ginhatag ang Iloilo City Government.
Ginpahayag ni Treñas nga nakasugtan nga pahanugutan nga makapauli ang mga OFW sa tion nga magnegatibo sa swab test kag sa ila balay na lang magapaidalom sa 14-day quarantine.
Samtang, ginahulat na lang ang disenyo sang laboratory nga ipahamtang sa syudad sang Iloilo kag ginalauman nga sa masunod nga semana, may yara na sang estimated budget para sa nasambit nga proyekto.
Ang nasambit nga laboratoryo ang may yara sang kumpleto nga equipment kasubong sa Western Visayas Medical Center kag sa Research Institute for Tropical Medicine agud nga makapatigayon sang mas madamo nga Coronavirus Disease 2019 (COVID-19) test.
