ILOILO – Ginaproteksyonan lang ni Iloilo Governor Arthur Defensor Jr. ang quarantine sang probinsya sang Iloilo rason nga indi ini gilayon makapapauli sang mga Ilonggo strandees nga yara sa nagkalain-lain nga bahin sang Pilipinas.
Sa interview sang Bombo Radyo kay Gov. Defensor, iya ginpahayag nga indi mahapos i-operationalize ang pagpauli sa Iloilo sang mga strandees kaangay na lang kun naghalin ini sa high risk area, kinahanglan nga nakapaidalom ini sa Polymerase Chain Reaction (PCR) test sa lugar kun diin man ini na stranded bangud mabudlay kun magsaylo ang Coronavirus Disease 2019 (COVID-19) sa probinsya.
Indi kaangay sa mga Overseas Filipino Workers suno kay Defensor nga yara ang Overseas Workers Welfare Administration, Inter-Agency Task Force kag Maritime Industry Authority nga naga-consolidate.
Pahayag sang gobernador, sa pagpapauli sang mga Ilonggo strandees kinahanglan ang koordinasyon sang LGU to LGU agud mangin organisado kag indi ma kompromiso ang quarantine sang Iloilo.
Mabudlay man para sa Iloilo Provincial Government nga matumod ang mg strandees bangud indi maka dali-dali nga makapadala ang probinsya sang personnel sa nagkalain-lain nga lugar bangud sa COVID-19 pandemic.
Sa pihak nga bahin, may yara naman sang manug abot nga Overseas Filipino Workers sa Iloilo sa Myerkules nga adlaw halin sa Manila.
