SAN DIONISIO, ILOILO-Ginkumpirma sang Local Government Unit sang San Dionisio, Iloilo nga nakapauli na ang duha ka Overseas Filipino Workers nga na stranded sa Batangas City.
Sa interview sang Bombo Radyo kay Mayor Larry Villanueva, iya ginpahayag nga ginsugat sang ila ambulansya sa Caticlan Jetty Port ang duha ka OFWs.
Suno kay Villanueva, antes pa sini, nagnegatibo na ang duha sa Reverse Transcription–Polymerase Chain Reaction test kun sa diin mismo ang Overseas Workers Welfare Administration ang naghitso sang pagpatigayon sang RT-PCR test kag pagpasakay sa RORO vessel sa OFWs.
Ang duha ang naka-quarantine sa subong sa banwa sang San Dionisio kag nakuhaan naman sang swab sample kag kun magnegatibo, mahimo na sila nga makapauli sa ila balay.
Nagpanawagan naman si Villanueva sa tanan nga OFWs nga maluyag magpauli nga makig-angot lang sa San Dionisio Local Government Unit.
