ILOILO CITY – Ginkumpirma ni Department of National Defense Sec. Delfin Lorenzana nga may yara sang maga-abot nga Overseas Filipino Workers sa Panay buwas, Mayo 13.
Sa exclusive interview sang Bombo Radyo kay Lorenzana, iya ginpahayag nga may yara na sang koordinasyon sa tunga sang mga ahensya sang gobyerno nga katapo sang Inter-Agency Task Force tuhoy sa repatriation.
Suno kay Lorenzana, luyag siguraduhon sang task force nga mangin matalunsay ang pagpauli sang mga Overseas Filipino Workers kag wala sang may magpositibo sa Coronavirus Disease 2019 (COVID-19).
Ginpahayag ni Lorenzana nga napahibalo na ang tagsa ka Local Government Unit nga may yara sang magapauli santo sa manifesto kag ang ginapahanugutan lang nga makasakay sa barko amo ang mga nagnegatibo sa swab test kag nakatapos sang 14 ka adlaw nga quarantine.
Sa subong, madamo pa ang stranded OFWs kag ginapangitaan man sang paagi agud nga makapauli ang local strandees kag mga turista.
Santo sa manifesto, naglab-ot sa 66 ka Overseas Filipino Workers ang maga-abot sa Panay.
Sa interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga sa nasambit nga numero, 36 diri ang residente sang Iloilo apang wala lang sang kaathagan kun pila ang residente sang syudad kag pila naman ang sa probinsya.
Kasubong sa kinaandan nga protocol, ang tagsa ka Local Government Unit amo ang in-charge sa pagsugat, pagpatigayon sang swab test kag pag quarantine sa magapauli nga Overseas Filipino Workers.
